Äntli hämers wieder mal gschaft d'Fotene z'bearbeite und en Bricht schriebe, mer händ momentan räge freis Wätter und Sunne beglückt eus mit ihrne Sunnestrahle :o) Mir sinds i volle züg am gnüsse! Es git viel z'verzellä. Ich hoffe, dass i nüt vergisse, also ich fang mal a vo eusne ufregende Erläbnis z'brichtä....
Ufem Wäg richtig Svolvaer (Lofoten) hämer en Abstächer ine Käserei gmacht mitemene härzige Kafi und es Lädeli, det hämer eus gstärcht mitere feine Waffle.
Natürli hämer dä es paar Käs probiert und eine, zwei kauft.Bevor mer nach Svolvaer sind hämer en super schöne Schlafplatz mit Ussicht uf en Stand und Meer gfunde näbed ganz ufgstellte Engländer vo London. Chum simer ane gfahre mit eusem Büsli händs scho Türe vo ihrem Wohnwage offe gha, dä Kopf use gstreckt und eus herzlich begrüesst. Händ eus chli ustusched über Norwege, was mer gseh und erläbd händ und sie händ eus no en super Tipp gä, was mer us
eusem viele Fisch chöntet mache, Fischhamburger und händ dä eus no zwei probier Hamburger gä, was eus sehr gfreut hät.
Nachem Zmorge hämer eus uf dä Wäg gmacht und händ Svolvaer besichtigt und sind dä no is 'Magic Ice'. Das isch e ehemaligi Fischlagerhalle vo 500 m2 und hüt sind dete Eisskulpture,e Bar, lässige belüchtig und Musik bi -6 Grad, wo mer bestuhne chan. Bevor mer das Eisriech natürli beträte händ, hämer en dicke Mantel und es paar dünni händschli über cho. Nach eusere Besichtigung häts no en Drink imene Eisglas gä.
Dä isch es witer gange richtig Vesterälen bi Sunneschie und traumhafter Landschaft, das blau vom Meer und das grüen vo dä Wiesene, Berge und dä blaui Himmel, eifach super.
Wo mer in Stö a cho sind, hämer eus informiert über Wahlsafari und händ eus grad für dä nächsti Tag agmolde. Das erst Mittag gsi isch, hämer no e Wanderig entlang vo dä Küste gmacht zumene Fischerdörfli Nyksund, wo bis vor kurzer Zit no e Geisterstadt gsi isch und jetzt häts doch wieder läbe i dem chline Dorf gä mit drü Restaurants und s'ganze Jahr läbed det öpe 6-10 lüt. Mir sind dä im Restaurant eis go schnappe und händ mitem Bsitzer (Dütsche) chli pläuschled und Zit ganz vergässe. Mir händ eus dä übers Gebirge uf dä Rückwäg gmacht und sind immer wieder Fraue begägned. Nachemene steile Ufstieg stönd da plötzlich zwei Herre voll Gschaled mit Gittare ufem Berg und händ eus Frücht und Schoggi abote, was mir natürli nöd usgschlage händ. Gstärcht isch es witer gange, am höchste Punkt mitere unglaubliche Ussicht vo dere 
Wanderig sind nomal drü Manne Gschaled dete gstande, das mal mit Kueche, Kafi und Tee und mir sind au det verwöhnt worde. Dur en kurze Schwaz hämer use gfunde, das 46 Fraue die Wanderig mached und es paar Manne händ Ihri Fraue mit dere super liebe gestik überrascht, was definitiv glunge isch. 22.45 simer dä nudelfertig bim Büsli a cho, händ no hurti ä Suppe gässe und dän en schlafplatz gsuecht und dä simer ganz gschwind i pfused.
Ufgstande, kurz Informiert worde und scho simer unterwägs gsi ufem Boot. Es hät under Wasser en Canyon und dete trifft mär die unglaublich riesige Wal, jedoch nur Mändli, wel für d'Wibli und die Junge isch dä Wäg det hi zwit und s'Meer isch s'kalt. Mir sind sehr gspannt gsi und händ immer ume glueged und ghoft das mer en Wahl gsehnd und sini schön Flosse. Am Afang isch es chli harzig gsi, aber dä hämer doch es paar gsehe, die Tier sind eifach gigantisch und wenns dä abtauched und ihri schön Flosse pressentiered, eifach gigantisch. Uf dä Rückfahrt hämer dä no ganz e feini Fischsuppe und es Butterbrötli becho, wo eus sehr gmundet hät. Dä simer no ganz langsam anere Vogelinsle verbie gfahre, mit Papageigetaucher, sind die schön, dreizehen Möve,Kormorane, Gemeine Seehunde, etc.
Nach eusere Wahlsafari, hämer eus i dä Kuchi no is züg gleit und no Fischhamburger gmacht, zerst Herdöpfel gschelt, koched, zumene muesverarbeitet, dä Fisch i Stückli gschnitte, Zwieble und Knobli ghackt, chli Lauch und es Rüebli fien gschnitte, churts a dünstet und das mitem Herdöpfelmues gmischt, es Ei und chli Paniermehl drunder gmischt, zu Hamburger gformt und dä ab i Pfanne. Chamer also nur empfehle.
Dä simer witer nach Andenes und vo dete hämer ä Fähre nach Gryllefjord gno und sind richtig Tromsö gfahre. Det simer dä uf dä Husberg mitem Seilbändli, wo mer e wunderschöni Ussicht uf Tromsö gnosse händ. Tromsö isch eini vo dene Städt wo im zweite Wältkrieg nöd niederbrännt worde isch vo dä Dütsche bevors gange sind. Darum häts au e Autofrei Zone, mitere herzige, Flaniermeile mit dene Holzhüser vo dozumal. Imene Fischerlädeli diräkt am Hafe, hämer eus dä wieder i deckt mit feine leckereie. (Die einte händ ja vo däm Lachs chöne probiere). Nach dem mir eus gstärcht händ isch es witer richtig Norde gange.
Mir händ eus paar mal überleid, ob mer as Nordkapp sölled gah oder nöd, wel mir händ so viel negativs ghört, das mer eifach nüt gseht und das es nur e abzokerei isch und sich nöd lohni. Mir sind sehr hi und her grisse gsi, sehr unschlüssig. Mir händ en halt gmacht bimene Beizli es Kafi drunke und die unglaublich ussicht uf die Berge und Fjorde gnosse. Churz bevor mer wieder los händ wele, fahrt en Zürcher näbed eus ane mit dä Familie und die händ sehr gschwehrmt vo dä Fahrt det hi und sie sind scho zwei mal gsi und gönd s'dritt mal as Nordkapp und hoffed das mal chli me z'gseh als die letste zwei mal. Sie händ uf jede fall sehr gschwermt und vo da isch für eus klar gsi, mir fahred zum Nordkapp.D'fahrt isch würkli bezaubernd, spannend und interessant und s'beste dra gsi isch, mir händ schöns Wätter gha. Uf dere Fahrt zum Nordkapp hämer so viel schöns und ufregends gseh, wie die Ränntier. Dä 
fahrsch und fahrsch und plötzlich stönd zmitzt uf dä Strass es paar Ränntier, im erst momänt verstahsch gar nöd was da abgaht und statt vo dä strass z'gah, träbbeleds vorem auto her und lueged immer wieder hindere, mal rächts und dä links. Das isch so lustig. Nachane hämer immer usschau ghalte wos Ränntier hät und es hät immer wieder Gruppierige gha uf Waide und Strasse. Die einte händ unglaublich schöni grossi Gweih gha, es sind sehr schöni Tier, aber wenns vorem Auto her laufed, gseht das so lustig us, sie händ mega o Bei, dä muess mer eifach smile.
Jupi, mir händs gschaft und sind nach dere Traumfahrt guet am Nordkapp a cho, am nördlichste Punkt vo Europa und es isch wunder schöns Wätter. Gschnäll a dä Front es super Plätzli ergatered, so dasmer hine ine sitze chönd und is Meer use luege, dä simer ume gloffe und händ s'Nordkapp beguetachtet und die gigantisch ussicht ufs Meer use, ohni Ändi in sicht gnosse. Es Gebäude mitemene riese Golfballe obe druf für Touriste mit allerlei, en mega grosse Souvenierlade, es Restaurant, es Thai-Museum, e Darstellig vo dä Marine usem zweite Wältkrieg, e Kapälle, e Grotte-Bar und es Postamt für dä nördlichst, wichtigi Poststämpfel, das alles simer kurz go besichtige. Aja, es hät no es 3D Kino gha mitemene Film vo 17 Minute übers Nordkapp, wies sich das ganze über die Jahreszite 
verändered, isch spannend gsi.Zu dem Nordkappalass hämer eus au öpis gedignigs zum Znacht gmacht, Räntierfilet mitemene Safranrisotto und en guete Wie däzue und händ die wunderschöni Abigstimmig gnosse. Es paar Autos witer isch au es Zürcherbüsli gstande und sind rasch mit ihne is gspröch cho, mit dä Jessica und em Chrigi hämer dä en ganz lässige, amüsante Abig/Nacht verbracht und eis, zwei zäme drunke ;o)
Nach dere coole nacht isch es am nöchste Tag witer gange richtig Finnland, mer händ dä no eimal in Norwege übernachtet bevor mer über Gränze sind. Mer händ dä Inarisee als nöchstes Ziel gha, händ eus dete im Infozentrum informiert, was es da so git und beschlosse das mer im Lemmenjoki-Nationalpark e Zweitageswanderig mached, dä simer go Poste und händ eusi Sache packt und dä isch es scho los gange. Das isch dä grössti Nationalpark in Finnland und hät 9000 Räntier vo drü verschiedene Bsitzer wo dur de Wald strieled, welchi mir au gseh händ.I dä erste Etappe hämer 18.5 Km am Lemmenjokifluss entlang gmacht, es isch alles super Beschildered und es hät einigi ganz schöni Rastplätz zum Fürle und s'Zält ufstelle und die sind immer a Bäch oder Flüss, wo Drinkwasser isch. 
Mir händ dä nach eusem lange Marsch so en Rastplatz ufgsuecht, s'Für hät bereits brännt, wo eus sehr entgägecho isch, da mir en Bärehunger gha händ. Es finnischs Päärli isch grad am Pfannkueche über em Für am mache gsi, mir händ dä euses Zält ufgstellt und eusi Kochutensilie uspackt, en Gmüesrisotto und e Wurst vom Grill häts gä. Händ dä mit dä Finne au nochli gspröchled, isch ganz es netts Volk, wenns dä mal chli ufdaued und us sich use chömed. Nachem Znacht, was sehr gmundet hät, häts dä es Kafi und Guetzli zumene Uno gä und dä Stefan hät nochli witer gfürled, das mer gnueg warm gha händ. Dä simer gli mal is Bett, da mir doch rächt uf dä schnurre gsi sind und am nächste
Tag wieder fit mönd si. Nachem Zmorge hämer eusi sache wieder packt und dä isch es witer gange uf eusere abentürliche Wanderig. Am zweite Tag hämer 16.5 Km zruggleit bis Kultassatama und dete simer dä mitem Flussboot 1 Stund und 30 Minute zrug gfahre zu eusem Usgangspunkt. Die Fahrt isch au sehr lustig gsi, a zwei Orte hämer mösse usstige und es Stück laufe, da dä Fluss zwenig Wasser gha hät, sehr amüsant und schön isch die Fahrt gsi.
Am nöchste Tag hämer dä e zwei Stündig Bootsfahrt ufem Inarisee gmacht, da chamer nur traumhaft säge, de isch würkli unglaublich schön! Mir sind dä bevors Boot wieder retour isch, usgstiege und sind die 11 Km zrug gloffe. Unterwägs amene schöne Rastplatz, am See hämer dä eusi Würst und Maiskolbe ufem Für brutzled und gässe, bevors dä gstärcht witer gange isch. Mir sind nöd so schnäll fürschi cho wie mir dänkt händ, es hät überall Heidelbeeristüdeli gha, wo mir natürli gsamlet händ und das isch öpe so gange; eis Beeri in Sack, eis Beeri is Muul, eis Beeri in Sack und eis Beeri is Mull...... mhmmmd, sind die fein und vorallem sehr gross.
Himbeeri hämer au no gfunde, die sind ja Zuckersüess gsi und sind grad im Mul vergange und zwei Moltebeer hämer au gfunde, was sehr sälte isch und darum au rächt tür i dä Läde zum kaufe, hät sehr en eigne gschmack, aber sehr fein.
Jetzt simer grad bim Igangszentrum zum Urho-Kekkonen-Nationalpark und mached morn e Tageswanderig. Anschinend häts i dem Park zwei Duzend Bäre und gränzt a Russland, wo öpe die en Wolf über Gränze i de Nationalpark chunt. Mir sind uf jede fall gspannt.
Dases in Finnland überall Saunas hät isch natürli au cool, eimal wird mit Füür gheizt und eimal mit Strom, aber die meiste sind scho mit Holz. Das händs ja devinitiv gnueg.Drum hauemers jetzt id Sauna und zum abkühle häts grad än Fluss vore dra, cool.
Bis gli und moi moi!
Usem Höche Norde in Finnland
Seraina und Stefan
